హైదరాబాద్ లాయర్ హత్య కేసులో నిందితుల అరెస్ట్

హైదరాబాద్‌లో సంచలనం సృష్టించిన న్యాయవాది కాజా మొయినుద్దీన్ హత్య కేసులో పోలీసులు పురోగతి సాధించారు. ఈ కేసుకు సంబంధించి ప్రధాన నిందితుడితో సహా నలుగురిని గోవాలో అరెస్ట్ చేశారు. హత్యకు ఉపయోగించిన కారును కబాడీగూడకు చెందిన వినయ్ అనే వ్యక్తి నడిపినట్లు పోలీసులు గుర్తించారు.

వివరాల్లోకి వెళ్తే, గత శనివారం (మే 23) మాసబ్‌ట్యాంక్ వద్ద మొయినుద్దీన్ తన నివాసం నుంచి కారులో బయలుదేరుతున్న సమయంలో, వేగంగా వచ్చిన మరో కారు ఆయన వాహనాన్ని బలంగా ఢీకొట్టింది. ఈ దాడిలో తీవ్రంగా గాయపడిన మొయినుద్దీన్‌ను స్థానికులు వెంటనే ఆసుపత్రికి తరలించారు. అయితే, అక్కడ చికిత్స పొందుతూ ఆయన మరణించారు.

ఘటన అనంతరం నిందితులు పరారయ్యారు. దాడికి సంబంధించిన దృశ్యాలు సమీపంలోని సీసీ కెమెరాల్లో రికార్డ్ అయ్యాయి. ఈ ఫుటేజీ ఆధారంగా దర్యాప్తు చేపట్టిన పోలీసులు, వినయ్‌ను ప్రధాన నిందితుడిగా గుర్తించి గాలింపు చర్యలు చేపట్టారు. చివరికి, అతడితో పాటు మరో ముగ్గురిని గోవాలో అదుపులోకి తీసుకున్నారు.